Son Xəbərlər
•Donald Tramp İrana təşəkkür etdi •İlham Əliyev Rəcəb Tayyib Ərdoğana başsağlığı verdi •İlham Əliyev qanun imzaladı •AQEM-in Azərbaycanda keçiriləcək sammitinə hazırlıqlar müzakirə olunub •Rauf Cabbarov: “Kibertəhdidlərin qarşısının alınmasında dövlət-özəl tərəfdaşlığı xüsusi əhəmiyyət daşıyır”
NEWSBAKU.AZ
|
Təhsil

MƏKTƏBLƏRDƏ ŞAGİRD DAVRANIŞLARI İLƏ BAĞLI NARAHATEDİCİ HALLAR: MAARİFLƏNDİRİCİ VƏ PREVENTİV YANAŞMANIN ZƏRURİLİYİ

24 April, 2026 10:38 0
Paylaş:
MƏKTƏBLƏRDƏ ŞAGİRD DAVRANIŞLARI İLƏ BAĞLI NARAHATEDİCİ HALLAR: MAARİFLƏNDİRİCİ VƏ PREVENTİV YANAŞMANIN ZƏRURİLİYİ

Son dövrlərdə ölkə üzrə ümumtəhsil müəssisələrində şagirdlər arasında baş verən xoşagəlməz hallar ictimai narahatlıq doğurmaqla yanaşı, təhsil mühitinin keyfiyyətinə və şagirdlərin psixoloji rifahına mənfi təsir göstərir.

Newsbaku.az  Qeyd olunan məsələnin aktuallığı onun kompleks yanaşma əsasında araşdırılmasını və qarşısının alınması istiqamətində sistemli, ardıcıl və məqsədyönlü tədbirlərin həyata keçirilməsini zəruri edir. Məktəblərdə sağlam tərbiyə mühitinin formalaşdırılması bu istiqamətdə əsas prioritet kimi çıxış edir. Şagirdlər arasında qarşılıqlı hörmət, etik davranış normaları, sosial məsuliyyət və sağlam ünsiyyət bacarıqlarının inkişaf etdirilməsi təlim-tərbiyə prosesinin ayrılmaz tərkib hissəsi olmalıdır. Müəllimlər bu prosesdə yalnız bilik verən pedaqoji kadr kimi deyil, eyni zamanda yüksək mənəvi keyfiyyətlərə malik nümunəvi şəxsiyyət və istiqamətləndirici tərbiyəçi funksiyasını yerinə yetirirlər.

Bununla yanaşı, müasir dövrdə mənəvi dəyərlərin qorunması və emosional zəkanın erkən yaşlardan inkişaf etdirilməsi xüsusi əhəmiyyət kəsb edir. Şagirdlərin yalnız akademik biliklərlə deyil, həm də empatiya, səbir, qarşılıqlı anlayış, sosial adaptasiya və emosiyalarını düzgün idarə etmə bacarıqları ilə formalaşdırılması onların həm məktəb mühitində, həm də cəmiyyət daxilində sağlam münasibətlər qurmasına mühüm zəmin yaradır. Erkən yaşlardan bu keyfiyyətlərin məqsədyönlü şəkildə aşılanması aqressiv davranışların azalmasına, qarşılıqlı hörmətin möhkəmlənməsinə və sağlam sosial mühitin formalaşmasına əhəmiyyətli töhfə verir. Bu baxımdan, məktəb və ailə institutlarının koordinasiyalı fəaliyyəti uşaqların hərtərəfli — həm mənəvi, həm də emosional inkişafının təmin edilməsində həlledici rol oynayır.

Eyni zamanda, valideynlərin bu prosesdə fəal iştirakı mühüm əhəmiyyət daşıyır. Valideynlər övladlarının davranış və psixoloji vəziyyətinə diqqətlə yanaşmalı, onlarla müntəzəm və səmimi ünsiyyət qurmalı, təhsil müəssisələri ilə sıx əməkdaşlıq etməlidirlər. Məktəb və ailə arasında qarşılıqlı etimada əsaslanan əməkdaşlıq mühiti formalaşdığı təqdirdə, şagird davranışları ilə bağlı mənfi halların qarşısının alınması daha effektiv şəkildə təmin oluna bilər. Nəzərə almaq lazımdır ki, bugünkü şagirdlər gələcəyin vətəndaşlarıdır.

Onların milli-mənəvi dəyərlərə sadiq, sosial məsuliyyətli, sağlam düşüncəli və vətənpərvər şəxsiyyət kimi yetişdirilməsi dövlətin və cəmiyyətin strateji məqsədlərindən biridir. Bu istiqamətdə həyata keçirilən hər bir maarifləndirici və tərbiyəvi tədbir cəmiyyətin dayanıqlı inkişafına və sağlam gələcəyin formalaşmasına xidmət edir.

Binəqədi rayonu 244 nömrəli tam orta məktəbin direktoru Şəfa Qurbanova